الخميس، 18 سبتمبر 2014

أحاسيس وحشانى أتمنى ترجع


فيه أحاسيس وحشانى أوى كنا بنحس بيها و أحنا صغيرين
هى أحاسيس ممكن معرفش أكتبها بس هحاول أوصلهالكم

فاكر مع أول دخول الشتا و أنت صغير و أمك تنزل اللحاف من الدولاب و ترميه عليك و انت لسه هتنام و من كتر الفرحه و النشوه تقعد تفرك و تتحرك حركات هيستيريه من كتر أحساس الفرحه اللى بتحسها بتمشى فى عروقك

طب فاكر قعدة الباجور فى الشتا و يا سلام لو أمك بتعمل عليه سمك مشوى و لا قرنبيط و محدش يسألنى أشمعنى الأكلتين دول مرتبطين بالباجور لأنى معرفش

طب فاكر لما كنت تصحى بدرى الساعه 6 على صوت الشيخ محمد رفعت و لو صحيت من الساعه 8 للساعه 10 تفضل تتنقل من إذاعة القاهره لإذاعة الشرق الأوسط علشان تسمع أشهر البرامج فى التوقيت ده بصوت سناء منصور فى الشرق الأوسط و أبله فضيله و أمال فهمى فى إذاعة القاهره

طب فاكر فى رمضان قبل المغرب صوت الشيخ عبد الباسط أو الشيخ محمد رفعت و أحساسنا لما كنا بنشوف بوجى و طمطم و نيللى أو شريهان أو فطوطه أثناء الفطار
و بعد الفوازير على طول تاخد فانوسك أبو شمعه أو بعد التطور الفانوس أبو عصفوره بتنور 

طب فاكر صوت التواشيح قبل الفجر و أزاى بيكون أحساسنا بالسعاده إننا سهرنا للوقت ده 
طب فاكر لما كنا بنسهر و عند أول خيط للصبح مع زقزقة العصافير كنا بنحس بسعاده عامله أزاى و كنا نفتخر أننا سهرنا لغاية الصبح و نفضل نتغنى بيها طول السنه
طب فاكر سهرة يوم الوقفه مع أصحابك و أنت عيل صغير و لابس التريننج الجديد بتاع الوقفه و كل شويه أمك تبص عليك من الشباك تطمن عليك مع بسمه صافيه تسعدك

طب فاكر لمة العيله لما كنا نقعد نرغى فى كل شئون حياتنا بدون موبايلات ترن كل شويه و لا حد فينا مشغول فى نت لأنهم مكانوش موجودين أصلا
طب فاكرين أول يوم فى المدرسه اللى كنت بشم ليه رائحه خاصه لا أستطيع وصفها و تشعرنى بالسعاده و بقدوم الدراسه
طب فاكر و فاكر و فاكر ................
أشتقت لهذه الحياه فمن منكم مشتاق مثلى